ថៃ៖ ប្រទេសថៃ បានរាយការណ៍ពីករណីឆ្លងកូវីដ-១៩ ថ្មីខ្ពស់បំផុតមិនធ្លាប់មានរហូតដល់ចំនួន ៩,៦៩២ករណី នៅថ្ងៃសុក្រនេះ នាំឱ្យចំនួនអ្នកឆ្លងកូវីដ-១៩ សរុបនៅក្នុងប្រទេសនេះឡើងដល់ ៣៨១,៩០៧ករណីហើយ ខណៈដែលអាជ្ញាធរពាក់ព័ន្ធទាំងអស់បាននឹងកំពុងញាប់ដៃញាប់ជើងក្នុងការប្រឹងប្រែងទប់ស្កាត់ការឆ្លងរាលដាលជារលកដ៏ធំក្នុងសហគមន៍នេះ។
ទន្ទឹមនឹងចំនួនអ្នកឆ្លងជាង៩,៦០០នាក់នេះ ថៃក៏បានរាយការណ៍ពីករណីអ្នកស្លាប់ថ្មីចំនួន ៦៧នាក់បន្ថែមទៀត នាំឱ្យចំនួនអ្នកស្លាប់ដោយសារកូវីដ-១៩ នៅក្នុងប្រទេស ថៃ សរុបកើនឡើងដល់ ៣,០៩៩នាក់ហើយ។
ថៃកំពុងស្វះស្វែងក្នុងការផ្តល់វ៉ាក់សាំងឱ្យដល់ប្រជាជនជាង ៦៦លាននាក់របស់ខ្លួនឱ្យលឿនបំផុតតាមដែលអាចធ្វើទៅបាន ស្របពេលដែលផែនការនេះកំពុងមានភាព យឺតយ៉ាវដោយសារក្រុមហ៊ុនដែលទទួលបានសិទ្ធិផលិតវ៉ាក់សាំង AstraZeneca នៅក្នុងប្រទេសថៃដែលបានលើកឡើងថា ការផ្គត់ផ្គង់វ៉ាក់សាំងជាង ៦១លានដូស នឹងអាចមានភាពយឺតយ៉ាវជាង ៥ខែ បើប្រៀបនឹងផែនការដែលបានគ្រោងទុក។
ថ្វីត្បិតករណីឆ្លងរាលដាលស្ថិតក្នុងកម្រិតខ្ពស់ក៏ពិតមែន ប៉ុន្តែនៅថ្ងៃព្រហស្បតិ៍ម្សិលមិញនេះ ថៃបានប្រកាសត្រៀមទទួលស្វាគមន៍ភ្ញៀវទេសចរបរទេសចូលមកកាន់ប្រទេសខ្លួនឡើងវិញ ពោលគឺកោះទេសចរណ៍ចំនួន ៣ គ្រោងនឹងបើកទទួលអ្នកទេសចរឡើងវិញរួមមានកោះសាមុយ កោះតាវ និងកោះផាង៉ាន ដោយកន្លងមកថៃបានអនុញ្ញាតឱ្យមានអ្នកទេសចរបរទេសចូលមកកាន់កោះភូកេតរបស់ខ្លួន ដោយអនុវត្តវិធានការ "Sandbox" ដើម្បីការពារកូវីដ-១៩៕